האם אתה מוכן לפגוש את אלוהים?

האם אתה מוכן לפגוש את אלוהים? כל אדם יפגוש את אלוהים ולכן צריך להיות מוכן!

 

איוב פרק יט

יט וַיַּעַן אִיּוֹב, וַיֹּאמַר׃ ² עַד־אָנָה תּוֹגְיוּן נַפְשִׁי; וּתְדַכְּאוּנַנִי בְמִלִּים׃ ³ זֶה עֶשֶׂר פְּעָמִים תַּכְלִימוּנִי; לֹא־תֵבֹשׁוּ, תַּהְכְּרוּ־לִי׃ ⁴ וְאַף־אָמְנָם שָׁגִיתִי; אִתִּי, תָּלִין מְשׁוּגָתִי׃ ⁵ אִם־אָמְנָם עָלַי תַּגְדִּילוּ; וְתוֹכִיחוּ עָלַי, חֶרְפָּתִּי׃ ⁶ דְּעוּ־אֵפוֹ כִּי־אֱלוֹהַּ עִוְּתָנִי; וּמְצוּדוֹ, עָלַי הִקִּיף׃ ⁷ הֵן אֶצְעַק חָמָס וְלֹא אֵעָנֶה; אֲשַׁוַּע, וְאֵין מִשְׁפָּט׃

פסוק 8

⁸ אָרְחִי גָדַר וְלֹא אֶעֱבוֹר; וְעַל נְתִיבוֹתַי, חֹשֶׁךְ יָשִׂים׃ ⁹ כְּבוֹדִי מֵעָלַי הִפְשִׁיט; וַיָּסַר, עֲטֶרֶת רֹאשִׁי׃ ¹⁰ יִתְּצֵנִי סָבִיב וָאֵלַךְ; וַיַּסַּע כָּעֵץ, תִּקְוָתִי׃ ¹¹ וַיַּחַר עָלַי אַפּוֹ; וַיַּחְשְׁבֵנִי לוֹ כְצָרָיו׃ ¹² יַחַד יָבֹאוּ גְדוּדָיו, וַיָּסֹלּוּ עָלַי דַּרְכָּם; וַיַּחֲנוּ סָבִיב לְאָהֳלִי׃ ¹³ אַחַי מֵעָלַי הִרְחִיק; וְיֹדְעַי, אַךְ־זָרוּ מִמֶּנִּי׃ ¹⁴ חָדְלוּ קְרוֹבָי; וּמְיֻדָּעַי שְׁכֵחוּנִי׃ ¹⁵ גָּרֵי בֵיתִי וְאַמְהֹתַי לְזָר תַּחְשְׁבֻנִי; נָכְרִי, הָיִיתִי בְעֵינֵיהֶם׃ ¹⁶ לְעַבְדִּי קָרָאתִי וְלֹא יַעֲנֶה; בְּמוֹ־פִי, אֶתְחַנֶּן־לוֹ׃

פסוק 17

¹⁷ רוּחִי זָרָה לְאִשְׁתִּי; וְחַנֹּתִי, לִבְנֵי בִטְנִי׃ ¹⁸ גַּם־עֲוִילִים מָאֲסוּ בִי; אָקוּמָה, וַיְדַבְּרוּ־בִי׃ ¹⁹ תִּעֲבוּנִי כָּל־מְתֵי סוֹדִי; וְזֶה־אָהַבְתִּי, נֶהְפְּכוּ־בִי׃ ²⁰ בְּעוֹרִי וּבִבְשָׂרִי דָּבְקָה עַצְמִי; וָאֶתְמַלְּטָה, בְּעוֹר שִׁנָּי׃ ²¹ חָנֻּנִי חָנֻּנִי אַתֶּם רֵעָי; כִּי יַד־אֱלוֹהַּ, נָגְעָה בִּי׃ ²² לָמָּה תִּרְדְּפֻנִי כְמוֹ־אֵל; וּמִבְּשָׂרִי, לֹא תִשְׂבָּעוּ׃

האם אתה מוכן לפגוש את אלוהים?

²³ מִי־יִתֵּן אֵפוֹ וְיִכָּתְבוּן מִלָּי; מִי־יִתֵּן בַּסֵּפֶר וְיֻחָקוּ׃ ²⁴ בְּעֵט־בַּרְזֶל וְעֹפָרֶת; לָעַד, בַּצּוּר יֵחָצְבוּן׃ ²⁵ וַאֲנִי יָדַעְתִּי גֹּאֲלִי חָי; וְאַחֲרוֹן, עַל־עָפָר יָקוּם׃ ²⁶ וְאַחַר עוֹרִי נִקְּפוּ־זֹאת; וּמִבְּשָׂרִי, אֶחֱזֶה אֱלוֹהַּ׃ ²⁷ אֲשֶׁר אֲנִי אֶחֱזֶה־לִּי, וְעֵינַי רָאוּ וְלֹא־זָר; כָּלוּ כִלְיֹתַי בְּחֵקִי׃

פסוק 28

²⁸ כִּי תֹאמְרוּ מַה־נִּרְדָּף־לוֹ; וְשֹׁרֶשׁ דָּבָר, נִמְצָא־בִי׃ ²⁹ גּוּרוּ לָכֶם מִפְּנֵי־חֶרֶב, כִּי־חֵמָה עֲוֹנוֹת חָרֶב; לְמַעַן תֵּדְעוּן שַׁדִּין (שַׁדּוּן)׃