משלי ג

משלי ג

 

 

משלי פרק ג

ג בְּנִי תּוֹרָתִי אַל־תִּשְׁכָּח; וּמִצְוֹתַי, יִצֹּר לִבֶּךָ׃ ² כִּי אֹרֶךְ יָמִים וּשְׁנוֹת חַיִּים; וְשָׁלוֹם, יוֹסִיפוּ לָךְ׃ ³ חֶסֶד וֶאֱמֶת, אַל־יַעַזְבֻךָ קָשְׁרֵם עַל־גַּרְגְּרוֹתֶיךָ; כָּתְבֵם, עַל־לוּחַ לִבֶּךָ׃ ⁴ וּמְצָא־חֵן וְשֵׂכֶל־טוֹב; בְּעֵינֵי אֱלֹהִים וְאָדָם׃    פ

⁵ בְּטַח אֶל־יְהוָה בְּכָל־לִבֶּךָ; וְאֶל־בִּינָתְךָ, אַל־תִּשָּׁעֵן׃ ⁶ בְּכָל־דְּרָכֶיךָ דָעֵהוּ; וְהוּא, יְיַשֵּׁר אֹרְחֹתֶיךָ׃ ⁷ אַל־תְּהִי חָכָם בְּעֵינֶיךָ; יְרָא אֶת־יְהוָה, וְסוּר מֵרָע׃ ⁸ רִפְאוּת תְּהִי לְשָׁרֶּךָ; וְשִׁקּוּי, לְעַצְמוֹתֶיךָ׃ ⁹ כַּבֵּד אֶת־יְהוָה מֵהוֹנֶךָ; וּמֵרֵאשִׁית, כָּל־תְּבוּאָתֶךָ׃ ¹⁰ וְיִמָּלְאוּ אֲסָמֶיךָ שָׂבָע; וְתִירוֹשׁ, יְקָבֶיךָ יִפְרֹצוּ׃    פ

משלי ג

¹¹ מוּסַר יְהוָה בְּנִי אַל־תִּמְאָס; וְאַל־תָּקֹץ, בְּתוֹכַחְתּוֹ׃ ¹² כִּי אֶת אֲשֶׁר יֶאֱהַב יְהוָה יוֹכִיחַ; וּכְאָב, אֶת־בֵּן יִרְצֶה׃ ¹³ אַשְׁרֵי אָדָם מָצָא חָכְמָה; וְאָדָם, יָפִיק תְּבוּנָה׃ ¹⁴ כִּי טוֹב סַחְרָהּ מִסְּחַר־כָּסֶף; וּמֵחָרוּץ, תְּבוּאָתָהּ׃ ¹⁵ יְקָרָה הִיא מִפְּנִיִּים (מִפְּנִינִים); וְכָל־חֲפָצֶיךָ, לֹא יִשְׁווּ־בָהּ׃ ¹⁶אֹרֶךְ יָמִים בִּימִינָהּ; בִּשְׂמֹאולָהּ, עֹשֶׁר וְכָבוֹד׃ ¹⁷ דְּרָכֶיהָ דַרְכֵי־נֹעַם; וְכָל־נְתִיבוֹתֶיהָ שָׁלוֹם׃ ¹⁸ עֵץ־חַיִּים הִיא לַמַּחֲזִיקִים בָּהּ; וְתֹמְכֶיהָ מְאֻשָּׁר׃    פ

¹⁹ יְהוָה, בְּחָכְמָה יָסַד־אָרֶץ; כּוֹנֵן שָׁמַיִם, בִּתְבוּנָה׃ ²⁰ בְּדַעְתּוֹ תְּהוֹמוֹת נִבְקָעוּ; וּשְׁחָקִים, יִרְעֲפוּ־טָל׃ ²¹ בְּנִי אַל־יָלֻזוּ מֵעֵינֶיךָ; נְצֹר תֻּשִׁיָּה, וּמְזִמָּה׃ ²² וְיִהְיוּ חַיִּים לְנַפְשֶׁךָ; וְחֵן, לְגַרְגְּרֹתֶיךָ׃ ²³ אָז תֵּלֵךְ לָבֶטַח דַּרְכֶּךָ; וְרַגְלְךָ, לֹא תִגּוֹף׃

משלי ג

²⁴ אִם־תִּשְׁכַּב לֹא־תִפְחָד; וְשָׁכַבְתָּ, וְעָרְבָה שְׁנָתֶךָ׃ ²⁵ אַל־תִּירָא מִפַּחַד פִּתְאֹם; וּמִשֹּׁאַת רְשָׁעִים, כִּי תָבֹא׃ ²⁶ כִּי־יְהוָה יִהְיֶה בְכִסְלֶךָ; וְשָׁמַר רַגְלְךָ מִלָּכֶד׃ ²⁷ אַל־תִּמְנַע־טוֹב מִבְּעָלָיו; בִּהְיוֹת לְאֵל יָדֶיךָ (יָדְךָ) לַעֲשׂוֹת׃ ²⁸ אַל־תֹּאמַר לְרֵעֶיךָ (לְרֵעֲךָ) לֵךְ וָשׁוּב וּמָחָר אֶתֵּן, וְיֵשׁ אִתָּךְ׃ ²⁹ אַל־תַּחֲרֹשׁ עַל־רֵעֲךָ רָעָה; וְהוּא־יוֹשֵׁב לָבֶטַח אִתָּךְ׃ ³⁰ אַל־תָּרוֹב (תָּרִיב) עִם־אָדָם חִנָּם; אִם־לֹא גְמָלְךָ רָעָה׃ ³¹ אַל־תְּקַנֵּא בְּאִישׁ חָמָס; וְאַל־תִּבְחַר, בְּכָל־דְּרָכָיו׃ ³² כִּי תוֹעֲבַת יְהוָה נָלוֹז; וְאֶת־יְשָׁרִים סוֹדוֹ׃ ³³ מְאֵרַת יְהוָה בְּבֵית רָשָׁע; וּנְוֵה צַדִּיקִים יְבָרֵךְ׃ ³⁴ אִם־לַלֵּצִים הוּא־יָלִיץ; וְלַעֲנִיִּים (וְלַעֲנָוִים), יִתֶּן־חֵן׃ ³⁵כָּבוֹד חֲכָמִים יִנְחָלוּ; וּכְסִילִים, מֵרִים קָלוֹן׃

משלי ד

משלי פרק ד

ד שִׁמְעוּ בָנִים מוּסַר אָב; וְהַקְשִׁיבוּ, לָדַעַת בִּינָה׃ ² כִּי לֶקַח טוֹב נָתַתִּי לָכֶם; תּוֹרָתִי, אַל־תַּעֲזֹבוּ׃ ³ כִּי־בֵן הָיִיתִי לְאָבִי; רַךְ וְיָחִיד, לִפְנֵי אִמִּי׃⁴ וַיֹּרֵנִי, וַיֹּאמֶר לִי, יִתְמָךְ־דְּבָרַי לִבֶּךָ; שְׁמֹר מִצְוֹתַי וֶחְיֵה׃ ⁵ קְנֵה חָכְמָה קְנֵה בִינָה; אַל־תִּשְׁכַּח וְאַל־תֵּט, מֵאִמְרֵי־פִי׃ ⁶ אַל־תַּעַזְבֶהָ וְתִשְׁמְרֶךָּ; אֱהָבֶהָ וְתִצְּרֶךָּ׃ ⁷ רֵאשִׁית חָכְמָה קְנֵה חָכְמָה; וּבְכָל־קִנְיָנְךָ, קְנֵה בִינָה׃ ⁸ סַלְסְלֶהָ וּתְרוֹמְמֶךָּ; תְּכַבֵּדְךָ, כִּי תְחַבְּקֶנָּה׃ ⁹ תִּתֵּן לְרֹאשְׁךָ לִוְיַת־חֵן; עֲטֶרֶת תִּפְאֶרֶת תְּמַגְּנֶךָּ׃

משלי ד

¹⁰ שְׁמַע בְּנִי וְקַח אֲמָרָי; וְיִרְבּוּ לְךָ, שְׁנוֹת חַיִּים׃ ¹¹ בְּדֶרֶךְ חָכְמָה הֹרֵתִיךָ; הִדְרַכְתִּיךָ, בְּמַעְגְּלֵי־יֹשֶׁר׃ ¹² בְּלֶכְתְּךָ לֹא־יֵצַר צַעֲדֶךָ; וְאִם־תָּרוּץ, לֹא תִכָּשֵׁל׃ ¹³ הַחֲזֵק בַּמּוּסָר אַל־תֶּרֶף; נִצְּרֶהָ, כִּי־הִיא חַיֶּיךָ׃ ¹⁴ בְּאֹרַח רְשָׁעִים אַל־תָּבֹא; וְאַל־תְּאַשֵּׁר, בְּדֶרֶךְ רָעִים׃ ¹⁵ פְּרָעֵהוּ אַל־תַּעֲבָר־בּוֹ; שְׂטֵה מֵעָלָיו וַעֲבוֹר׃ ¹⁶ כִּי לֹא יִשְׁנוּ אִם־לֹא יָרֵעוּ; וְנִגְזְלָה שְׁנָתָם, אִם־לֹא יִכְשׁוֹלוּ (יַכְשִׁילוּ)׃ ¹⁷ כִּי לָחֲמוּ לֶחֶם רֶשַׁע; וְיֵין חֲמָסִים יִשְׁתּוּ׃ ¹⁸ וְאֹרַח צַדִּיקִים כְּאוֹר נֹגַהּ; הוֹלֵךְ וָאוֹר, עַד־נְכוֹן הַיּוֹם׃ ¹⁹ דֶּרֶךְ רְשָׁעִים כָּאֲפֵלָה; לֹא יָדְעוּ, בַּמֶּה יִכָּשֵׁלוּ׃    פ

משלי ד

²⁰ בְּנִי לִדְבָרַי הַקְשִׁיבָה; לַאֲמָרַי, הַט־אָזְנֶךָ׃ ²¹ אַל־יַלִּיזוּ מֵעֵינֶיךָ; שָׁמְרֵם, בְּתוֹךְ לְבָבֶךָ׃ ²² כִּי־חַיִּים הֵם לְמֹצְאֵיהֶם; וּלְכָל־בְּשָׂרוֹ מַרְפֵּא׃ ²³מִכָּל־מִשְׁמָר נְצֹר לִבֶּךָ; כִּי־מִמֶּנּוּ, תּוֹצְאוֹת חַיִּים׃ ²⁴ הָסֵר מִמְּךָ עִקְּשׁוּת פֶּה; וּלְזוּת שְׂפָתַיִם, הַרְחֵק מִמֶּךָּ׃ ²⁵ עֵינֶיךָ לְנֹכַח יַבִּיטוּ; וְעַפְעַפֶּיךָ, יַיְשִׁרוּ נֶגְדֶּךָ׃ ²⁶ פַּלֵּס מַעְגַּל רַגְלֶךָ; וְכָל־דְּרָכֶיךָ יִכֹּנוּ׃ ²⁷ אַל־תֵּט־יָמִין וּשְׂמֹאול; הָסֵר רַגְלְךָ מֵרָע׃